अमृत पोखरेल बने नमुना संसदीय सभाको प्रधानमन्त्री, प्रविना कट्टेलले विधेयक प्रस्तुत गर्ने

संसदीय दलको नेता र सचेतकहरूको पार्टीले फर्छेउट गरेपछि सरकार बनाउने पालो आयो । कुनै पनि दलले बहुमत नल्याएकाले गठबन्धन अनिवार्य गर्नुपर्ने आवश्यकता थियो। तर संसद्को सबैभन्दा ठूलो दल राष्ट्रिय उदारवादी पार्टी लाई प्रतिपक्षको जिम्मा सुम्पिएर नेपाल नागरिक पार्टी र बृहत् गणतान्त्रिक पार्टीबीच गठबन्धन भई बृहद गणतान्त्रिक पार्टीको नेतृत्वको सरकार बन्यो। 

मन्त्रालय बाँडफाँड का क्रममा दुवै पार्टीहरूले आठ आठ मन्त्रालय राख्ने टुङ्गो लगाए । यो गठबन्धन सरकारको प्रधानमन्त्री बृहत गणतान्त्रिक पार्टीबाट अमृत पोखरेल बने। भने यस सदनमा प्रस्तुत हुने सामाजिक सञ्जाल विधेयक २०८१ को प्रस्तुतकर्ता सूचना तथा सञ्चारमन्त्री नेपाल नागरिक पार्टीबाट प्रविणा कट्टेल बनिन् ।

नेपाल विद्यार्थी सङ्घ नेपाल ल क्याम्पसका सभापति मोहम्मद माजिद परवेज भन्छन्, “प्रतिस्पर्धीहरूलाई नमुना संसदीय सदन अगाडि नै सरकार बन्ने र मन्त्रालयको बाँडफाँड हुने उक्त कार्यक्रम ले विद्यार्थीहरूमा नेतृत्व क्षमताको बिउविजन गरेको छ।”

साथै, फागुन १३ गते बिहान ७ बजेदेखि नेपालको प्रतिनिधि सभाको नमुना ढाँचामा संसदको सदन चल्ने पनि कार्यक्रम संयोजक आशिष सापकोटाले जानकारी दिए।