कोशी प्रदेशसभामा प्रयोग भएको ‘राजा’ शब्दलाई रेकर्डबाट हटाइएको छ ।

कोशी प्रदेशसभामा प्रयोग भएको ‘राजा’ शब्दलाई रेकर्डबाट हटाइएको छ । प्रदेशसभाको आइतबार बसेको बैठकको शून्य समयमा बोल्दै राप्रपा सांसद सविना बजगाईँले देशमा धर्मनिरपेक्षता, संघीयता र गणतन्त्र डलर खाएर डलरे नेताहरूले ल्याएको भनेकी थिइन् । 

त्यसप्रति नियमापत्ति जनाउँदै एमाले प्रमुख सचेतक विदुरकुमार लिङ्थेपले डलरवादी भन्ने शब्द रेकर्डबाट हटाउन माग गरे । 

राजाले प्रजातन्त्र दिवसको अवसरमा जनतालाई शुभकामना दिएको विषयलाई लिएर गणतन्त्रका मसिहा ठान्ने केही नेताहरूले राजालाई थुन्ने अभिव्यक्ति सञ्चार माध्यममा आएको देखिएको छ । यस कुराको म घोर निन्दा र भर्त्सना गर्दछु । यी सबै अभिव्यक्ति विदेशबाट आउने डलरको भरमा आएका हुन्,’ बजगाईले भनिन् ।

लिङ्थेपले ‘राजाले बोलेको’ भन्ने शब्दप्रति फेरि माओवादी सांसद गोम्बु शेर्पाले नियमापत्ति गरे । उनले भने, ‘नेपालको संविधानले र प्रदेशसभा नियमावलीले राजा चिन्दैन । अहिलेको संविधानमा वा नेपालमा कोही राजा छैन । त्यसकारण यो राजा भन्ने शब्द रेकर्डबाट हटाइयोस् ।’

 केही बेरको दोहोरी पछि सभामुख अम्बरबहादुर विष्टले यो राजा शब्द र डलर खाएको भन्ने विषय पनि अप्रमाणित कुरा भएकोले त्यो पनि हटाउन संसद् सचिवालयलाई आग्रह गरे । 

यद्यपि विशेष समय लिएर बोलेका राप्रपा दलका नेता भक्तिप्रसाद सिटौलाले राजा नेपाली जनताको मनमनमा भएको कारण संविधानले चिनेको जिकिर गरे । केही नेताहरूले राजालाई देश निकाला गर्छु भनेकोप्रति पनि उनले आपत्ति जनाए ।