गोठालो भत्ता’ ले उत्साहित जुम्ली किसान, दुई सय बढीले दिए आवेदन

कर्णाली प्रदेश सरकारले सञ्चालन गरेको ‘गोठालो भत्ता’ कार्यक्रमले जुम्लाका किसानमा थप उत्साह भरेको छ। प्रदेश सरकारले पशुपालन व्यवसायलाई प्रवर्द्धन गर्न थालेपछि यहाँका किसानहरू भेडा पालनमा अझै प्रेरित भएका छन्।

पातारासी गाउँपालिका–२ का नरविर बोहोरा विगत लामो समयदेखि भेडा पालन व्यवसायमा संलग्न छन्। सुरुमा थोरै संख्यामा भेडा पाल्ने उनले हाल १९० भन्दा बढी भेडा पालेका छन्।

सरकारले ‘गोठालो भत्ता’ दिन थालेपछि पशुपालनमा सहजता आएको उनले बताए। ‘भत्ता पाएपछि थप भेडा पाल्ने हौसला बढेको छ। कृषकको आयआर्जन बढाउने यस्ता कार्यक्रमले पशुपालन व्यवसाय फस्टाउन मद्दत गर्छ’, उनले भने।

तिला गाउँपालिका–८ का भेडा गोठाला रंगे रावतले पनि भत्ता कार्यक्रमले किसानलाई थप प्रेरित गरेको बताए। ‘मैले ८० भेडा पालेको छु। सरकारको सहयोगले हामीलाई थप प्रोत्साहन मिलेको छ,’ उनले भने।

कर्णाली प्रदेश सरकारले लागू गरेको ‘गोठालो भत्ता’ कार्यक्रमअन्तर्गत जुम्लामा हालसम्म २०७ किसानले आवेदन दिएका छन्। प्रदेश सरकारको भूमि व्यवस्था, कृषि तथा सहकारी मन्त्रालयअन्तर्गत सञ्चालन हुने यो कार्यक्रम आर्थिक वर्ष २०७८/७९ देखि लागू गरिएको हो।

पशु अस्पताल तथा पशु सेवा कार्यालय, जुम्लाका प्रमुख ज्ञानेन्द्रसिंहका अनुसार आवेदन दिएका कृषकहरूको अनुगमनपछि मात्र भत्ता वितरण गरिनेछ। ‘स्थलगत अनुगमन गरी कृषकले साँच्चै भेडा पालन गरिरहेका छन् कि छैनन् भन्ने यकिन गर्न सम्बन्धित वडा जनप्रतिनिधिसँग समन्वय गरिनेछ। अनुगमन र मूल्याङ्कनपछि प्रतिवेदन तयार पारेर भत्ता वितरण हुनेछ,’ उनले भने।

पशु स्वास्थ्य अधिकृत भीमप्रसाद तिमिल्सिनाका अनुसार ५० भन्दा बढी भेडा पाल्ने किसानलाई मासिक १,५०० रुपैयाँका दरले वार्षिक १८,००० रुपैयाँ भत्ता दिइने व्यवस्था छ।

‘यो वर्ष कार्यक्रमका लागि मन्त्रालयबाट ४५ लाख रुपैयाँ बजेट प्राप्त भएको छ। सो रकम सम्बन्धित किसानको बैंक खातामा जम्मा गरिनेछ,’ उनले बताए।