तुइनको भरमा कर्णाली नदी पार गर्दै खडीखेतवासी, जोखिममा दैनिक यात्रा

सर्केगार्ड गाउँपालिका–२ र ६ को खडीखेतस्थित कर्णाली नदीमा पुनः तुइन निर्माण गरी स्थानीय बासिन्दा दैनिक आवतजावत गर्न बाध्य भएका छन्। यसअघि रिप गाउँका स्थानीयले बनाएको काठेपुल चैत महिनामा नदीको बाढीले बगाएपछि तुइनकै सहारामा नदी पार गर्नुपर्ने अवस्था आएको हो।

रिप गाउँका स्थानीय नेत्रबहादुर महताराका अनुसार, करिब २५० घरधुरीका नागरिक, लालीगुराँस मावि लिप्नेमा अध्ययनरत विद्यार्थी तथा वडा नम्बर ३ को उनपानी गाउँका बासिन्दा तुइन प्रयोग गरी कर्णाली नदी पार गर्दै आएका छन्। तत्काल निर्माण गरिएको उक्त तुइनको लठ्ठा नदीको दुवैतर्फ रुखमा बाँधिएको छ।

तर, एक्लै तर्न सक्ने अवस्था नरहेको र तुइन तर्ने रहर नभई बाध्यता बनेको महताराले बताए। गाउँलेहरूका अनुसार, वडा नम्बर २ र ३ मा झोलुङ्गे पुल त छ, तर दुवै स्थानसम्म पुग्न डेढ–डेढ घण्टा लाग्ने भएकाले चाँडो पार गर्न तुइन रोजिएको हो।

महिला, बालबालिका र ज्येष्ठ नागरिकले तुइन प्रयोग गर्न सक्ने अवस्था छैन। तर्न डर लाग्ने र जोखिमपूर्ण तुइन नै हाल उनीहरूको एकमात्र विकल्प बनेको छ। स्थानीय बासिन्दाहरूले सुरक्षित आवागमनको व्यवस्था मिलाउन सरकारसँग आग्रह गरेका छन्।