१३ वर्षमै असाधारण प्रतिभा: ओजस्वी आचार्यको प्रेरणादायी यात्रा

सामान्यतया १३ वर्षको उमेरमा बालबालिका खेलकुद, पढाइ र साथीभाइसँग रमाइरहेका हुन्छन्। तर, पाल्पाको दमकडा माध्यमिक विद्यालयकी कक्षा ९ मा अध्ययनरत ओजस्वी आचार्य भने त्यो उमेरमै असाधारण प्रतिभा देखाएर चर्चा कमाउन सफल भएकी छन्।

सानैदेखि वाककला, तार्किक क्षमता, आत्मविश्वासपूर्ण प्रस्तुति र सामाजिक चेतनामा अब्बल ओजस्वी अहिले देशविदेशका कार्यक्रमहरूमा अतिथि वक्ताका रूपमा प्रस्तुत हुँदै आएकी छन्। उनी कक्षा ८ मै अध्ययनरत रहँदा थाइल्यान्डमा आयोजित एनआरएन कार्यक्रमलाई सम्बोधन गर्दै उपस्थित दर्शक–श्रोतालाई आश्चर्यचकित पार्न सफल भएकी थिइन्।

उनको प्रस्तुति शैली, विषयमा पकड, बोल्ने आत्मविश्वास र सामाजिक विषयमा गहिरो बुझाइ देख्दा उनीसँग भविष्यमा ठूलै योगदान दिने क्षमता रहेको सहजै अनुमान गर्न सकिन्छ।

ओजस्वीका आमा–बुबा दुवै शिक्षक हुन्। बुबा जीवन आचार्य दमकडा नमुना माविमा अस्थायी दरबन्दीमा प्लस टु तहसम्म अध्यापन गराउँछन् भने आमा मिठ्ठु आचार्य सोही विद्यालयमा स्थायी शिक्षकका रूपमा कार्यरत छन्। ओजस्वी पनि उनीहरूकै साथमा विद्यालय जाने–आउने गर्छिन्।

शिक्षक परिवारमा हुर्किएकी ओजस्वीको शिक्षाप्रतिको मोह र सामाजिक विषयप्रतिको सरोकार बाल्यकालमै देखिएको छ। उनको प्रतिभाले न केवल विद्यालयको, कि त पाल्पा जिल्लाकै गर्वको विषय बनेको छ।

यदि यिनै गुण र लगनशीलता उनीमा अझै सुदृढ हुँदै गयो भने ओजस्वी आचार्य निकट भविष्यमै देशकै प्रेरणादायी वक्ता र सामाजिक अभियन्ता बन्ने सम्भावना प्रवल देखिन्छ।