दक्षिण कोरियामा नयाँ राष्ट्रपति चयनका लागि मतदान शुरु

दक्षिण कोरियामा नयाँ राष्ट्रपतिको चयनका लागि आज मतदान सुरु भएको छ। स्थानीय समयअनुसार बिहान ६ बजेबाट मतदान प्रक्रिया प्रारम्भ भएको हो।

यसपटकको निर्वाचनमा मुख्य प्रतिस्पर्धा वामपन्थी डेमोक्रेटिक पार्टी अफ कोरिया (डीपीके) र दक्षिणपन्थी पीपुल पावर पार्टी (पीपीपी)बीच देखिएको छ। यद्यपि, चुनावी मैदानमा पाँच जना उम्मेदवार प्रतिस्पर्धामा रहेका छन्।

निर्वाचनको नतिजा बुधबार सार्वजनिक गरिने अपेक्षा गरिएको छ।

६ महिनाअघि तत्कालीन राष्ट्रपति तथा पीपीपी नेता युन सुक योलले देशमा सैन्य कानून घोषणा गरेका थिए। उनले केही घण्टामै उक्त निर्णय फिर्ता लिए पनि त्यसको व्यापक विरोध भएको थियो। त्यसपछि उनीविरुद्ध महाअभियोग प्रक्रिया अगाडि बढाइएको थियो।

गत ४ अप्रिलमा संवैधानिक अदालतले महाअभियोग अनुमोदन गर्दै युनलाई पदबाट हटाएको थियो। संविधानअनुसार राष्ट्रपतिको पद रिक्त भएपछि ६० दिनभित्र नयाँ निर्वाचन गर्नुपर्ने प्रावधानअनुसार आजको निर्वाचन सम्पन्न भइरहेको हो।

सैन्य कानूनको घोषणा, त्यसपछि आएको महाभियोग र हालको निर्वाचनले दक्षिण कोरियामा राजनीतिक अस्थिरता सिर्जना गरेको छ। तर नयाँ राष्ट्रपतिको निर्वाचनपछि मुलुकमा स्थायित्व आउने अपेक्षा गरिएको छ।