समाचार

शिक्षकहरूको आन्दोलन माग पुरा नभएसम्म नरोकिने ,

गणेश राज

बुधबार, वैशाख ३, २०८२

शिक्षकहरूको आन्दोलन माग पुरा नभएसम्म नरोकिने ,

7.34k Shares

काठमाडौं केन्द्रित आन्दोलन गरिरहेका शिक्षकहरूले आफ्नो आन्दोलन नरोक्ने भएका छन् । मंगलबार बसेको मन्त्रिपरिषद् बैठकले विद्यालय शिक्षा विधेयक पास गर्ने गरी संसद अधिवेशन बोलाए पनि शिक्षकहरूले आन्दोलन नरोक्ने भएका हुन् ।

संसद अधिवेशन बोलाएसँगै सरकारले शिक्षकहरूलाई आन्दोलन रोकेर कार्यक्षेत्र फर्कन भनेको थियो । शिक्षक आन्दोलनका कारण विद्यालय भर्ना अभियानका साथसाथै कक्षा १२ को परीक्षा पनि प्रभावित हुने भएपछि सरकार संसद अधिवेशन बोलाउन बाध्य भएको हो ।

तर, शैक्षिक आमहड्ताल घोषणा गरेका शिक्षकहरूले भने आन्दोलन नरोक्ने भएका छन् । नेपाल शिक्षक महासंघका अध्यक्ष लक्ष्मीकिशोर सुवेदीले आफूहरूले उठाएको मागमा राज्य अझै अनुदार देखिएको उल्लेख गरेका छन् । उनले आन्दोलन नरोकिने पनि जनाएका छन् ।

'अब हामी निर्णायक मोडमा आइपुगेका छौँ । हामीले उठाएका विषयमा राज्य यथावन अनुदार देखिन्छ,' सुवेदीले फेसबुकमा लेखेका छन्, 'त्यसैले अझ बढी प्रतिबद्धता र सहभागिताका साथ आन्दोलन अघि बढाउनुको विकल्प छैन ।'

उनले काठमाडौंबाहिर रहेका शिक्षकहरूलाई पनि काठमाडौं बोलाउँदै आफूहरू 'आन्दोलनको मोर्चामा पर्खिरहेको' बताएका छन् ।

प्रकाशित मिति: बुधबार, वैशाख ३, २०८२

प्रतिक्रिया दिनुहोस्