समाचार

प्रचण्डले भनेझैँ सरकार परिवर्तन हुन लागेको के सत्य हो ?

गणेश राज

मंगलबार, वैशाख २, २०८२

प्रचण्डले भनेझैँ सरकार परिवर्तन हुन लागेको के सत्य हो ?

3.4K Shares

नयाँ वर्ष मनाउन गृहनगर भरतपुर जानुअघि माओवादी केन्द्रका अध्यक्ष पुष्पकमल दाहाल प्रचण्डले सार्वजनिक रूपमै एमाले अध्यक्ष केपी शर्मा ओली नेतृत्वको सरकारले एक वर्ष नकटाउने घोषणा गरे । भरतपुर विमानस्थलमा ओर्लिएपछि त एक कदम अघि बढेर नयाँ वर्षमा नयाँ सरकार आउने भनिदिए ।

सरकारको आयु तोक्ने गरी उनले घोषणा गर्नुको मुख्य आधार भने कांग्रेस सभापति शेरबहादुर देउवालाई पठाएको सन्देश थियो । प्रचण्डले कांग्रेस नेताहरूमार्फत देउवालाई दुई प्रस्ताव पठाएका छन् । पहिलो, ओली सरकारलाई विस्थापन गरेर देउवा नेतृत्वमा नयाँ सरकार गठन गर्ने र माओवादी केन्द्रले सरकारबाहिरै बसेर सघाउने । दोस्रो, माओवादी केन्द्र साना दलहरूसमेत लिएर देउवा नेतृत्वको सरकारमा जाने । दुई प्रस्ताव बूढानीलकण्ठ पठाएपछि कांग्रेस–एमाले गठबन्धनमा यसले तरङ्ग ल्याउने विश्वासमा उनले ओली सरकारको आयु तोकिरहेका छन् ।

कांग्रेसमा संस्थापनइतर समूह सधैँ देउवा निर्णयको विपक्षमा रहँदै आएको छ । कांग्रेस–माओवादी केन्द्र गठबन्धन हुँदा कोशी प्रदेशमा कांग्रेसमा विद्रोह गराएर एमालेको समर्थन केदार कार्कीलाई मुख्यमन्त्री बनाउने पनि त्यही समूह हो । संस्थापनइतर नेता शेखर कोइराला सुरुदेखि नै कांग्रेस–एमाले गठबन्धनको विपक्षमा छन् । तर, प्रचण्डको नयाँ कार्डलगत्तै महामन्त्रीद्वय गगन थापा र विश्वप्रकाश शर्माको बोली पनि फेरिएको छ । यसले कतै प्रचण्डले भनेझै नयाँ वर्षमा नयाँ सरकारको गृहकार्य भइरहेको त छैन भन्ने आशंका पनि उब्जाएको छ ।

नयाँ वर्षको पूर्वसन्ध्यामा प्रचण्डले नयाँ घटनाक्रमहरू विकसित भएको दाबी गर्दै आफ्नो अनुभवका आधारमा नयाँ सरकारको सम्भावना रहेको बताएका थिए । ‘परिस्थिति यस्तो बन्दै छ कि यो सरकार धेरै अगाडि जान सहज छैन भन्ने कुरा पनि देखिइराख्या छ । त्यस कारण कुनै पनि सम्भावना छ,’ उनले भनेका थिए, 'नयाँ वर्षले केही न केही निकासचाहिँ लिएर आउँछ भन्ने मलाई लाग्छ ।’

प्रचण्डको दाबी र कांग्रेस नेताहरू प्रधानमन्त्री ओलीप्रति असन्तुष्टि पोखिरहेको सन्दर्भले सरकार हेरफेरको संकेत गरेको हो भनेर हामीले कांग्रेस प्रवक्ता डा. प्रकाशशरण महतलाई सोधेका थियौँ । ‘त्यस्तो कुनै कसरत वा संकेत मैले थाहा पाएको छैन । तत्काल त्यो सम्भावना पनि छैन,’ उनले भने, ‘अस्थिरताको र्‍याइँर्‍याइँ मच्चाएर कसलाई फाइदा पुर्‍याउन खोजेको हो, मैले बुझेको छैन ।’

त्यसो त २०८१ वर्षभरि सरकार हेरफेरकै हल्ला चलिरह्यो । गतवर्ष नयाँ वर्षमा प्रचण्ड नेतृत्वको तत्कालीन सरकार ढल्ने हल्ला चल्न थालिसकेको थियो । जबकि २१ फागुन २०८० मा मात्र प्रचण्डले कांग्रेसलाई हटाएर एमालेसँग नयाँ सत्ता साझेदारी थालेका थिए । डेढ महिनामै सुरु भएको चलखेलले तीन महिनामा सरकार नै ढल्यो । १७ असारमा कांग्रेस–एमालेबीच राजनीतिक स्थिरताका लागि भन्दै सातबुँदे सहमतिपछि ओली नेतृत्वको सरकार बनेको थियो । तर, सरकारले सय दिन पूरा नगर्दै गठबन्धनमा गडबड आएको देखि भूराजनीतिक चलखेलका चर्चा चलिरहे । दसैँ कट्दैन, तिहार कट्दैन भन्दै विपक्षी दलका नेता प्रचण्ड एक वर्ष नटिक्ने अभिव्यक्तिसम्म आइपुगेका छन् ।

‘अहिलेसम्म हामी सहमतिप्रति पूर्णप्रतिबद्ध छौँ । बजार हल्लाको पछि नलागौँ,’ कांग्रेस प्रवक्ता महतले भने । उनी आफ्नै दलका नेताहरू पनि भिड हेरेर भाषणबाजी गर्दै हिँडेको भन्दै असन्तुष्ट सुनिए । वर्षभरि नै सरकार परिवर्तनको हल्ला चलाएर राम्रो नतिजाको अपेक्षा गर्न नसकिने उनको टिप्पणी थियो । विपक्षी दलका नेता प्रचण्डले सरकार ढल्ने हल्ला चलाउने र प्रधानमन्त्री ओलीले बारम्बार आफ्नो सरकारको आयु दिनगन्ती गर्दै ‘हल्लिँदा पनि हल्लिन्न’ भन्दै जवाफ फर्काउने गर्दा अस्थिरताको मनोविज्ञान बनेको देखिन्छ ।

प्रचण्डले नयाँ वर्षमा नयाँ सरकार आउने अभिव्यक्तिपछि राजनीतिक वृत्तमा नयाँ तरङ्ग आइरहेको बेला सोमबार बसेको एमाले सचिवालय बैठकले त्यसलाई असान्दर्भिक हल्ला भनेको छ । बैठकपछि एमाले उपमहासचिव प्रदीप ज्ञवालीले भने, ‘सरकार परिवर्तनको हल्लामा कुनै सत्यता छैन । सरकारबाहिर रहँदा प्रचण्डमा एक खालको कुण्ठा, एक खालको पीडाबोध प्रकट हुन्छ । अहिले सरकार परिवर्तन न कतैबाट सम्भव छ, न त्यसको सान्दर्भिकता छ ।’

प्रकाशित मिति: मंगलबार, वैशाख २, २०८२

प्रतिक्रिया दिनुहोस्