दुर्गम पालिकाबाट असल अभ्यास सिक्दै बुढानिलकण्ठ प्रमुख उपप्रमुख शिक्षा प्रमुख डोल्पा पुगे।

दुनैमा बुढानीलकण्ठ  
अन्यपालिकाका असल अभ्यासहरुबाट सिक्दै र आफूले अबलम्बन गरेका असल अभ्यासहरुबाट अन्य पालिकाले पनि सिक्न सकून भन्ने पवित्र भावना बोकेका बुढानीलकण्ठका नगर प्रमुख र उपप्रमुख यतिखेर कर्णाली अञ्चलको रुकुम पश्चिम, जाजरकोट र डोल्पाका असल अभ्यासहरुको अवलोकनमा रमाइरहेका छन् ।
जनताको सेवामा रातोदिन तल्लिन हुने नगर प्रमुख मिठाराम अधिकारी र नगर उपप्रमुख अनिता लामाले थोरै दिनको फुर्सद निकालेर मध्यपहाडी मार्गले कोरेको विकासको रेखा पहिल्याउँदै बाग्लुङको बुर्तिबाङ हुँदै रुकुमको राडीजिउँला हुँदै आज डोल्पाको दुनै पुग्न सफल भएका छन् । कच्चीबाटोबाट निक्कै दु:ख र सास्ती खेप्दै धुलाम्य भएर दुनै पुगेका नगर प्रमुख र उपप्रमुखले आज दुनैमा डोल्पा जिल्लाबाट कर्णाली प्रदेशमा प्रतिनिधित्व गर्ने माननीय बिर बहादुर शाही लगायत डोल्पाका विभिन्न स्थानीय तहका पालिका प्रमुखसँग आफ्ना अनुभवहरु आदान प्रदान गरेका छन् ।
विद्यालय तहको शिक्षाको उत्कृष्ट व्यवस्थापन गरी अपेक्षित सफलता हासिल गरेको बुढानीलकण्ठ नगरपालिकाले यस कार्यक्रम मार्फत आफ्ना असल शैक्षिक अभ्यासहरु आदान प्रदान गर्ने मुख्य अभिष्ट राखेको छ । यस कार्यक्रम अनुसार बुढानीलकण्ठ नगरपालिकाले अनिवार्य तथा आधारभूत शिक्षाको कार्यान्वयन, विद्यार्थीको सिकाइ उपलव्धि अभिवृद्धि,  शिक्षक पेसागत विकास र विद्यार्थी मूल्यांकनमा सुधार जस्ता शैक्षिक क्रियाकलापहरुमा अन्तरपालिका साझेदारी र सहकार्य गर्नेछ । 
संभव भएसम्म साझेदारीमा अन्तरपालिका स्तरका कार्यक्रम भौतिक रुपमा सञ्चालन गर्ने र नभए सूचना प्रविधिको प्रयोग गरेर भए पनि भर्च्युअल्ली कार्यक्रम आयोजना गरेर दुर्गमको शैक्षिक विकासमा योगदान पुर्याउने सोच यस कार्यक्रम मार्फत राखिएको छ । यस कार्यक्रमका लागि बुढानीलकण्ठ नगरपालिकाले साझेदारी गर्न लागिएका जाजरकोट र डोल्पाका पालिकाहरुमा विद्यार्थी झोला र स्टेशनरी लगायतका सामग्रीहरु पालिका पालिकासम्म पुर्याइसकेको छ ।
यस कार्यक्रमलाई प्रभावकारी रुपमा कार्यान्वयन गर्न अनुभव आदान प्रदान गर्ने, संयुक्त रुपमा साझा गन्तव्य निर्धारण गर्ने, शैक्षिक रणनीति र कार्यक्रम निर्माण गरी कार्यान्वयन गर्ने लगायका कार्यक्रम कार्यान्वयनमा जोड दिइने छ । यसको सफल कार्यान्वयन हुन सकेमा दुर्गम क्षेत्रका पालिकाहरुको शिक्षाको सुधार, विकास र उन्नयनमा उल्लेख्य टेवा पुग्न जाने कुरामा उपसचिब ललित विक्रम सिंहले कुनै द्धिविधा नरहेको बताएका छन् ।