अछाममा दशैँको बोकाको मासु खाँदा हड्डी अड्किएर एक जनाको दुःखद मृत्यु,

दशैँको अष्टमीका दिन बोकाको मासु खाँदा घाँटीमा हड्डी अड्किएर अछाममा एक जनाको मृत्यु भएको छ।

मृत्यु हुनेमा अछामको मंगलबजार निवासी ४२ वर्षीय डम्बर बहादुर कुवँर रहेका छन्। घरमा अष्टमीको अवसरमा काटिएको बोकाको मासु खाँदै गर्दा अचानक घाँटीमा हड्डी अड्किएको थियो।

घाँटीमा हड्डी अड्किएपछि उहाँ बेहोस हुनुभयो। तत्कालै स्थानीयले कुवँरलाई उपचारका लागि अस्पताल पुर्‍याए पनि चिकित्सकको सबै प्रयास असफल हुँदै उपचारकै क्रममा उहाँको ज्यान गएको अस्पताल स्रोतले जनाएको छ।

चाडपर्वमा मासुजन्य परिकार सेवन गर्दा सावधानी अपनाउन चिकित्सकहरूले सुझाव दिने गरेका छन्। यस्ता घटनाले सामान्य लाग्ने जोखिम पनि ज्यान लिने खालको हुन सक्ने देखाएको छ।

स्थानीय समुदायमा घटनाले शोकको छायाँ फैलिएको छ।