मिश्रित निर्वाचन प्रणाली स्थिर सरकारका लागि बाधकः अग्नि खरेल,

प्रधानमन्त्री केपी शर्मा ओलीका मानव अधिकार तथा संक्रमणकालीन न्यायसम्बन्धी सल्लाहकार तथा पूर्व कानूनमन्त्री अग्निप्रसाद खरेलले देशमा विद्यमान मिश्रित निर्वाचन प्रणाली नै स्थिर सरकारका लागि बाधक भएको बताएका छन्।

एमाले स्थायी कमिटी सदस्यसमेत रहेका खरेलले अहिलेको निर्वाचन प्रणाली परिवर्तन नगरी स्थिर सरकारको परिकल्पना गर्न नसकिने बताए। तर विद्यमान गणतान्त्रिक व्यवस्था, संघीयता तथा समावेशीतालाई बिगार्न नहुने बताए।

शनिवार झापाको बिर्तामोडमा प्रेस चौतारी नेपाल झापा शाखाले आयोजना गरेको पत्रकार भेटघाटका क्रममा आफ्नो धारणा प्रस्तुत गर्दै उनले समानुपातिक निर्वाचनबाट निर्वाचित सांसदहरू राष्ट्रिय सभाको रुप पनि दिन सकिने बताए।

उनले भने, ‘त्यो भएन भने प्रत्यक्ष निर्वाचन प्रणालीमै कोटा निर्धारण गर्न सकिन्छ। तर, यो निर्वाचन प्रणालीले स्थिर सरकार दिन सकिन्छ भन्ने आधार छैन। तर यो मेरो व्यक्तिगत विचार हो।’

संविधान संशोधन गर्न जति ढिलो हुन्छ त्यति नै संविधान ‘फेल’ हुने संभावना रहेकाले अब संशोधनका लागि दलहरूले छलफल गर्न ढिलो गर्न नहुने उनले बताए।

गत चैत १५ गतेको तीनकुने घटनाबारे निष्पक्ष छानविन गर्नुपर्ने माग उठिरहेका बेला उनले प्रशासनिकस्तरबाट छानविन गर्न सकिने बताए। अहिले नै न्यायिक छानविन गरिहाल्नुपर्ने कुनै जरुरी नरहेको उनको भनाइ थियो।

उनले भने, ‘न्यायिक समितिनै बनिहाले पनि त्यस्ले कुनै उथलपुथल ल्याउँदैन। छानविन गर्ने हो भने पनि प्रशासनिक छानविन भए पर्याप्त हुन्छ।’