बालेन शाहको सचिवालय असन्तुष्ट : स्वागतमा सहभागी जनप्रतिनिधि र कर्मचारीलाई कारबाहीको चेतावनी

काठमाडौं महानगरपालिकाका उपप्रमुख, वडाध्यक्ष र विभिन्न कर्मचारीहरूले प्रमुख प्रशासकीय अधिकृतलाई गरिएको स्वागत कार्यक्रमप्रति मेयर बालेन शाहको सचिवालयले कडा असन्तुष्टि व्यक्त गरेको छ।

मेयर शाहका स्वकीय सचिव भुपदेव शाहले शुक्रबार एक वक्तव्य जारी गर्दै भ्रष्टाचारमा संलग्न व्यक्तिहरूलाई स्वागत गरेर महानगरको मूल्य, मान्यता र नैतिकता कमजोर पारिएको टिप्पणी गरेका छन्।

"सरकारले भ्रष्टाचारमा मुछिएकालाई संरक्षण दिएको देखिएको छ। यस्ता व्यक्तिको स्वागतमा सहभागी हुनु स्वयं कानूनविपरीतको काम हो," शाहले बताएका छन्, "स्वागत कार्यक्रममा संलग्न कर्मचारी र जनप्रतिनिधिमाथि छानबिन गरेर कानुनी कारबाही अगाडि बढाइनेछ।"

स्रोतका अनुसार प्रमुख प्रशासकीय अधिकृतको स्वागतका क्रममा केही कर्मचारीहरू सक्रिय रूपमा संलग्न थिए भने केही वडाध्यक्षहरू समेत कार्यक्रममा सहभागी भएका थिए। उक्त स्वागत समारोहलाई सामान्य औपचारिकता भनिए पनि सचिवालयले यसलाई गम्भीर विषयको रूपमा लिएको हो।

यस घटनाले महानगरपालिकाभित्र आन्तरिक असमझदारी र सत्ताको द्वन्द्व चुलिएको संकेत देखिएको छ। मेयर शाह नेतृत्वको सचिवालय गत केही समयदेखि प्रशासनिक निर्णयमा कडाइका साथ निगरानी राख्दै आएको छ।

महानगरको आन्तरिक राजनीतिमा नयाँ तरंग ल्याएको यो घटनाले अबको दिनमा थप विवाद र खिचातानी बढ्ने सम्भावना देखिएको छ।