बालेन शाहको शिक्षक आन्दोलनप्रति प्रशंसा: 'चेतनशील समाजको निर्माण गरौँ'

मेयर शाहले आफ्नो सन्देशमा शिक्षकहरूको आन्दोलनले कुनै पनि सार्वजनिक सम्पत्तिलाई क्षति नगरेको र स्वच्छ वातावरणमा सम्पन्न भएकोप्रति आभार व्यक्त गर्दै लेखेका छन्, “प्रिय शिक्षकहरू, तपाईँहरूले आफ्नो आन्दोलन फोहोर नगरि, केहि नभत्काई गरिदिनुभयो, धन्यवाद। हामीले जरिवाना खोजेको होइनौँ, चेतना खोजेको हो। सार्वजनिक सम्पत्ति पनि आफ्नै सम्पत्ति हो भनेर त्यसलाई जोगाउने चेतनशील समाजको निर्माण गर्न खोजेको हो।”

उनले शिक्षकहरूलाई विद्यार्थीलाई पनि यही नैतिक शिक्षा दिन अनुरोध गरेका छन्। साथै, उनले समग्र समाज मिलेर चेतनशीलताको अभियानलाई अघि बढाउनुपर्नेमा जोड दिएका छन्। शाहले भने, “तपाईहरू त झन् शिक्षक हुनुहुन्छ, तपाईहरूको त झन् ठुलो जिम्मेवारी र भूमिका छ यसमा।”

शिक्षा प्रणालीलाई प्रभावकारी बनाउन तथा विद्यार्थीहरूको अध्ययनमा अवरोध नहोस् भन्ने उद्देश्यले उनले शिक्षक समुदायलाई आग्रह गरेका छन् कि आन्दोलन गर्दा पनि पढाइ प्रभावित नहोस्। साथै, उनले स्थानीय तहलाई सशक्त बनाउनुपर्ने आवश्यकता औंल्याउँदै भने, “गाउँगाउँमा सिंहदरबार भन्ने त नारा मात्र भयो। आशा छ, एकदिन आफ्नो अधिकारको लागि काठमाडौं धाइरहनु नपरोस्।”

मेयर शाहको यो अभिव्यक्ति शिक्षक आन्दोलनलाई सकारात्मक रूपमा हेरिएको सङ्केत हो। शिक्षाको माध्यमबाट समाजमा चेतनशीलता बढाउने उद्देश्य राख्दै उनले सार्वजनिक सम्पत्ति सुरक्षामा सबै नागरिकको भूमिका महत्त्वपूर्ण रहेको उल्लेख गरेका छन्।