पूर्वराजा ज्ञानेन्द्र शाहलाई ७ लाख ९३ हजार जरिवाना, महानगरको कारबाही

काठमाडौं महानगरपालिकाले पूर्वराजा ज्ञानेन्द्र शाहलाई ७ लाख ९३ हजार रुपैयाँ जरिवाना तोकेको छ। शुक्रबार राजधानीको तीनकुनेमा राजावादी समूहले गरेको प्रदर्शनका क्रममा सार्वजनिक सम्पत्तिमा क्षति पुगेको भन्दै महानगरले कारबाही अघि बढाएको हो।

महानगरले ८ वटा शीर्षकमा जरिवाना तोकेको जनाएको छ। फोहोरमैला फाल्ने, सडक तथा सार्वजनिक संरचनामा क्षति पुर्‍याउनेलगायतका आरोपमा महानगरले पूर्वराजा शाहलाई पत्र पठाउँदै जरिवाना तिर्न निर्देशन दिएको छ।

शुक्रबारको प्रदर्शन हिंसात्मक बनेपछि दुई जनाको ज्यान गएको थियो भने दर्जनौं प्रदर्शनकारी र सुरक्षाकर्मी घाइते भएका थिए। राजसंस्थाको पुनःस्थापनाको माग राख्दै भएको प्रदर्शनमा प्रहरी र प्रदर्शनकारीबीच झडप हुँदा स्थिति तनावपूर्ण बनेको थियो।

काठमाडौं महानगरपालिकाले सार्वजनिक सम्पत्तिको क्षति निवारण गर्न र वातावरण संरक्षणका लागि कडा नियम लागू गर्ने बताएको छ। महानगरका अनुसार, भविष्यमा यस्ता गतिविधि दोहोरिए थप कानूनी कारबाहीको प्रक्रिया अघि बढाउने जानकारी गराएको छ।