आजदेखि देशभर एसइई परीक्षा सुरू, ५ लाख भन्दा बढी विद्यार्थी सहभागी

काठमाडौं, चैत ७ – माध्यमिक शिक्षा परीक्षा (एसइई) आजदेखि देशभर सुरू भएको छ। राष्ट्रिय परीक्षा बोर्ड, परीक्षा नियन्त्रण कार्यालयका अनुसार, बिहान ८ बजेदेखि देशभरका २,०७९ परीक्षा केन्द्रबाट परीक्षा सञ्चालन भइरहेको छ।

आज पहिलो दिन अनिवार्य अङ्ग्रेजी, संस्कृत वेदविद्याश्रमतर्फ अनिवार्य संस्कृत रचना तथा मदरसातर्फ अनिवार्य अरेबिक भाषाको परीक्षा सञ्चालन भइरहेको छ।

यस वर्षको एसइईमा ५ लाख १४ हजार ७१ विद्यार्थी सहभागी भएको राष्ट्रिय परीक्षा बोर्डले जनाएको छ। परीक्षालाई स्वच्छ, निष्पक्ष र मर्यादित बनाउन सुरक्षा व्यवस्थासमेत कडा पारिएको छ।

देशभर परीक्षा केन्द्रहरूमा प्रहरी परिचालन गरिनुका साथै परीक्षा हलभित्र मोबाइल फोन तथा अन्य अनाधिकृत सामग्री लैजान प्रतिबन्ध लगाइएको छ। बोर्डले परीक्षाको विश्वसनीयता कायम गर्न सबै पक्षलाई संयमित रहन आग्रह गरेको छ।