काठमाडौँ उपत्यकाको १ सय २१ ठाउँमा चेकिङ

काठमाडौँ उपत्यका लगायत पहाडी क्षेत्रमा बिहीबार रङको पर्व होली मनाइँदै छ । उपत्यका प्रहरी कार्यालयले काठमाडौँ, भक्तपुर र ललितपुरमा होली लक्षित सुरक्षा योजना बनाएर लागु गरेको छ ।

बिहीबार बिहानैदेखि उपत्यकामा चेकजाँच सुरु गरिएको उपत्यका प्रहरी कार्यालयका एसएसपी शेखर खनालले रातोपाटीलाई बताए । उनका अनुसार ट्राफिक र स्थानीय प्रहरीले उपत्यकाको १ सय २१ ठाउँमा चेकजाँच गर्छन् । 

मापसे र लागु पदार्थ सेवन सम्बन्धी चेकजाँचमा कडाइ गरिने उल्लेख गर्दै अधिकारीले उत्साहको पर्वमा नकारात्मकता नल्याउन आग्रह गरेका छन् । होली खेल्न नचाहनेहरूलाई जबर्जस्ती रङ दल्ने र लोला हान्नेलाई पक्राउ गरेर कानुनी कारबाही गरिने एसएसपी अधिकारीले बताए । उनले भने, ‘कसैले जबर्जस्ती गरेमा १ सय नम्बरमा फोन गर्न मेरो आग्रह छ ।’

होली खेल्न नचाहनेलाई रङ दल्ने र मानसम्मानमा आँच पुर्‍याउनेलाई कानुनी दायरामा ल्याइने प्रहरीको सुरक्षा योजनामा उल्लेख छ । लागु पदार्थको परीक्षण गर्न उपत्यका प्रहरी कार्यालयले ट्राफिक प्रहरीलाई आवश्यक सामग्री र प्राविधिक जनशक्ति समेत उपलब्ध गराएको छ ।