ट्रम्पले चार भारतीय कम्पनीमाथि लगाए प्रतिबन्ध

नयाँ दिल्ली । अमेरिकाले पेट्रोलियम र पेट्रोकेमिकल उद्योगसँग सम्बन्धित कयौं कम्पनीहरूमाथि प्रतिबन्ध लगाएको छ । अमेरिकाले यी प्रतिबन्धहरू लगाएका कम्पनीहरू इरानको तेल उद्योगसँग सम्बन्धित छन् । यसमा केही भारतीय कम्पनीहरू पनि परेका छन् । इरानमाथि दबाब दिन अमेरिकाले यो कदम चालेको हो । सोमबार, अमेरिकाले इरानको पेट्रोलियम र पेट्रोकेमिकल उद्योगसँगको कथित सम्बन्धको लागि चार भारतीय कम्पनीहरू सहित १६ कम्पनीहरूमाथि प्रतिबन्ध लगाएको थियो । अमेरिकी अर्थ मन्त्रालयले जारी गरेको विज्ञप्तिका अनुसार प्रतिबन्धित भारतीय कम्पनीहरूमा अस्टिनशिप म्यानेजमेन्ट प्रा.लि., बीएसएम मरीन एलएलपी, कोसमोस लाइन्स इंक र फ्लक्स मेरिटाइम एलएलपी छन् । अमेरिकी विदेश मन्त्रालयले इरानको पेट्रोलियम र पेट्रोकेमिकल उद्योगसँगको सम्बन्धको लागि १६ कम्पनीहरूको पहिचान गरेर उनीहरूमाथि प्रतिबन्ध लगाएको विज्ञप्तिमा भनिएको छ । विदेश मन्त्रालयले अर्थ मन्त्रालयको विदेशी सम्पत्ति नियन्त्रण कार्यालय (ओएफएसी)सँगको  सहकार्यमा २२ जना व्यक्तिहरूमाथि पनि प्रतिबन्ध लगाएको छ । इरानको तेल उद्योगसँगअवैध ढुवानी सञ्जाललाई विघटन गर्न अमेरिकाले यो निर्णय लिएको बताइएको छ । यो नेटवर्कले एसियाली खरीदकर्ताहरूलाई इरानी तेल बेच्ने काम गर्दै आएको छ । उक्त सञ्जालले अवैध ढुवानी मार्फत करोडौं डलर मूल्य पर्ने कच्चा तेल बेच्ने प्रयास गरिरहेको थियो । इरानले तेल राजस्व मार्फत आतंकवादलाई आर्थिक रूपमा सहयोगगरिरहेको अमेरिका ठान्दछ । प्रतिबन्धले इरानको आर्थिक गतिविधिलाई नियन्त्रण गर्ने र आतंकवादलाई हुने आर्थिक सहयोगलाई रोक्ने अमेरिकी विश्वास छ ।