देशभर कक्षा १२ को वार्षिक परीक्षा सुरु

माध्यमिक शिक्षा परीक्षा (एसईई) सम्पन्न भएसँगै कक्षा १२ को अन्तिम वार्षिक परीक्षा आज सोमबारदेखि देशभर एकैसाथ सुरु भएको छ ।

राष्ट्रिय परीक्षा बोर्डका अनुसार निर्धारित तालिका अनुसार बिहान ८ बजेदेखि परीक्षा सञ्चालन गरिएको हो । यस वर्ष देशभरका १ हजार ४ सय २१ परीक्षा केन्द्रमार्फत करिब ४ लाख १८ हजार ८ सय विद्यार्थी परीक्षामा सहभागी भइरहेका छन् ।

परीक्षालाई मर्यादित, शान्तिपूर्ण र व्यवस्थित बनाउन बोर्डले देशभरका परीक्षा केन्द्रहरूमा आवश्यक सुरक्षा प्रबन्ध मिलाउनुका साथै केन्द्राध्यक्ष तथा कर्मचारी परिचालन गरेको जनाएको छ ।

बोर्डले परीक्षार्थीलाई निर्धारित समयमै उपस्थित भई नियम पालना गर्न आग्रह गरेको छ ।