देउराली आधारभूत विद्यालयमा शैक्षिक समीक्षा तथा पुरस्कार वितरण सम्पन्न, नयाँ शैक्षिक योजनासहित अगाडि बढ्ने संकल्प

जाजरकोटको कुशे गाउँपालिका–४ अर्छानीस्थित श्री देउराली आधारभूत विद्यालयमा शैक्षिक सत्र २०८२ को समीक्षा, पुरस्कार वितरण तथा आगामी शैक्षिक सत्र २०८३ को योजना निर्माण कार्यक्रम उत्साहपूर्ण वातावरणमा सम्पन्न भएको छ।
कार्यक्रम शिक्षक श्री प्रमेश्वर शाहको सञ्चालन तथा विद्यालय व्यवस्थापन समिति (वि.व्य.स.) अध्यक्ष श्री दिपकलाल जैसीको अध्यक्षतामा सम्पन्न भएको हो। कार्यक्रममा वडा सदस्य श्री नन्दाराम जैसी, वि.व्य.स. सदस्यहरू, पूर्व अध्यक्षहरू तथा अभिभावकहरूको उल्लेखनीय उपस्थिति रहेको थियो।

कार्यक्रमको प्रारम्भमा शिक्षक श्री दिपेन्द्र हमालले स्वागत मन्तव्य राख्दै विद्यालयको प्रगति यात्रामा सबैको साथ र सहयोगको कदर गरे।
यसैक्रममा प्रधानाध्यापक श्री सुरेन्द्र जैसीले शैक्षिक सत्र २०८२ मा विद्यालयले हासिल गरेका उपलब्धिहरू, सञ्चालन गरिएका शैक्षिक तथा अतिरिक्त क्रियाकलापहरूको विस्तृत समीक्षा प्रस्तुत गर्दै विद्यालयको समग्र अवस्थालाई स्पष्ट रूपमा चित्रण गरे।

उनले केवल समीक्षा मात्र नगरी आगामी शैक्षिक सत्र २०८३ का लागि स्पष्ट दृष्टिकोण, सुधारका प्राथमिकता र गुणस्तरीय शिक्षामा केन्द्रित योजनाहरू समेत प्रस्तुत गरे।
प्रधानाध्यापक जैसीको नेतृत्वमा विद्यालयले अनुशासन, नियमितता, शिक्षक–अभिभावक समन्वय र विद्यार्थी केन्द्रित शिक्षण विधिलाई प्राथमिकतामा राख्दै अगाडि बढेको उल्लेख गरिएको थियो। उनको दूरदर्शी सोच र सक्रिय पहलले विद्यालयलाई शैक्षिक सुधारको दिशामा अघि बढाउन महत्वपूर्ण भूमिका खेलेको कार्यक्रममा सहभागीहरूले व्यक्त गरे।

कार्यक्रममा उत्कृष्ट नतिजा हासिल गर्ने विद्यार्थीहरूलाई पुरस्कार वितरण गरिनुका साथै अभिभावक तथा अतिथिहरूबाट विद्यालयको गुणस्तर अभिवृद्धिका लागि विभिन्न रचनात्मक सुझावहरू संकलन गरिएको थियो।
समुदायसँग सहकार्य गर्दै गुणस्तरीय शिक्षा प्रदान गर्ने प्रतिबद्धतासहित विद्यालयले आगामी दिनमा थप प्रभावकारी योजना कार्यान्वयन गर्ने अठोट व्यक्त गरेको छ।
कार्यक्रमको फोटो स्रोत  युवा नवराज जैसी