महिला फुटबलमा एपिएफमाथि चुनौती थपिँदै

ललितपुरस्थित च्यासल रंगशालामा आजदेखि एन्फा शहीद स्मारक महिला लिग २०८२ सुरु हुँदैछ। अखिल नेपाल फुटबल संघ (एन्फा)को आयोजनामा हुने यस प्रतियोगितामा तीन विभागीयसहित कुल ९ टोलीले उपाधिका लागि प्रतिस्पर्धा गर्नेछन्।

घरेलु महिला फुटबलमा लामो समयदेखि दबदबा बनाउँदै आएको एपिएफ यसपटक पनि प्रमुख दाबेदारका रूपमा मैदानमा उत्रँदैछ। तर पछिल्ला वर्षहरूमा नेपाल पुलिस क्लब र त्रिभुवन आर्मी क्लब ले कडा चुनौती दिँदै आएका छन् भने यस सिजनमा संकटा क्लब पनि बलियो तयारीसहित प्रतिस्पर्धामा उत्रिएको छ।

संकटाले चार विदेशी खेलाडी अनुबन्ध गर्दै उपाधि दौडमा आफूलाई बलियो दाबेदारका रूपमा प्रस्तुत गरेको छ। प्रतियोगिताअघि भएको पत्रकार सम्मेलनमा प्रमुख टोलीका प्रशिक्षक र कप्तानहरूले प्रतिस्पर्धात्मक खेलको अपेक्षा गर्दै उपाधि जित्ने लक्ष्य व्यक्त गरेका छन्।
एपिएफका प्रशिक्षक जीवेशकुमार पाण्डेले टोली मानसिक र शारीरिक रूपमा तयार रहेको बताए पनि केही खेलाडी घाइते रहेको जानकारी दिए। कप्तान अनिता बस्नेतले भने अन्य टोली बलियो बन्दै गएकाले यसपटक लिग अझ प्रतिस्पर्धात्मक हुने बताइन्।
नेपाल पुलिस क्लबका प्रशिक्षक रविन श्रेष्ठले उत्कृष्ट खेलाडी समेट्दै उपाधि जित्ने लक्ष्य रहेको बताए। त्यस्तै, त्रिभुवन आर्मी क्लबले गोल स्कोरिङमा सुधार गर्दै राम्रो प्रदर्शन गर्ने तयारी गरेको जनाएको छ।

संकटाका प्रशिक्षक रवीन्द्र सिलाकारले विदेशी खेलाडीसहित टोली सुदृढ बनाइएको उल्लेख गर्दै शीर्ष तीनभित्र पर्ने वा उपाधि जित्ने लक्ष्य राखिएको बताए।
लिगको उद्घाटन खेलमा आज बिहान ११ बजे न्युरोड टिम (एनआरटी) र संकटा क्लबबीच प्रतिस्पर्धा हुनेछ भने दिउँसो ३ बजे झापा एफसीले त्रिभुवन आर्मी क्लबसँग खेल्नेछ।