आचारसंहिता उल्लङ्घनमा कुनै सम्झौता हुँदैन : निर्वाचन आयोग

निर्वाचन आयोगले निर्वाचन आचारसंहिता उल्लङ्घनका घटनामा कुनै पनि किसिमको नजरअन्दाज नगर्ने स्पष्ट पारेको छ । शुक्रबार आयोजित नियमित पत्रकार भेटघाटमा आयोगका प्रवक्ता नारायणप्रसाद भट्टराईले आचारसंहिता पालना गराउन र उल्लङ्घनकर्तालाई कानुनी दायरामा ल्याउन आयोगले सक्रियता बढाएको बताउनुभयो ।

प्रवक्ता भट्टराईका अनुसार पछिल्लो समय जिल्ला तहबाटै उजुरी लिने र त्यहीँबाट फर्छ्योट गर्ने क्रम बढेकाले केन्द्रमा उजुरीको चाप घट्दै गएको छ । आयोगले हालसम्म ३४ वटा राजनीतिक दल तथा उम्मेदवारलाई स्पष्टीकरण सोधेकोमा २४ वटाबाट जवाफ प्राप्त भइसकेको जनाएको छ ।

प्राप्त जवाफको अध्ययनपछि केन्द्रीय आचारसंहिता अनुगमन समितिले निर्वाचन (कसुर तथा सजाय) ऐनबमोजिम आवश्यक कारबाहीको निर्णय लिने उहाँले जानकारी दिनुभयो । “जवाफ लिइसकेपछि कारबाही हुन्छ कि हुँदैन भन्ने प्रश्न धेरैले सोध्नुहुन्छ । आचारसंहिता र निर्वाचन (कसुर तथा सजाय) ऐनले यसको स्पष्ट व्यवस्था गरेको छ । केन्द्रीय समितिले कानुनबमोजिम थप स्पष्टीकरण लिने वा कारबाही गर्ने निर्णय गर्छ । आचारसंहिता उल्लङ्घनका घटनामा आयोगले कुनै सम्झौता गर्दैन,” उहाँले भन्नुभयो ।

आयोगका अनुसार ६३ राजनीतिक दलका ५७ निर्वाचन चिह्नमा कुल ३ हजार १३५ उम्मेदवार चुनावी प्रतिस्पर्धामा छन् । तीमध्ये १ हजार ७७२ जना महिला र १ हजार ३६३ जना पुरुष उम्मेदवार रहेका छन् । आयोगको तथ्याङ्कअनुसार समानुपातिकतर्फ पुरुषको तुलनामा महिलाको सङ्ख्या बढी देखिएको छ ।
निर्वाचन प्रक्रियालाई थप व्यवस्थित र परिष्कृत बनाउने प्रतिबद्धता व्यक्त गर्दै आयोगले आचारसंहिताको पूर्ण पालना गर्न सबै राजनीतिक दल, उम्मेदवार तथा सरोकारवाला पक्षलाई आग्रह गरेको छ ।