निर्वाचन प्रचारका लागि स्वैच्छिक सहयोग लिन पाइने, रकम तोकेर चन्दा माग्न नपाइने : निर्वाचन आयोग

निर्वाचन आयोगले उम्मेदवार तथा राजनीतिक दलहरूले निर्वाचन प्रयोजनका लागि स्वैच्छिक सहयोग लिन पाउने स्पष्ट पारेको छ । आयोगका प्रवक्ता नारायणप्रसाद भट्टराईले प्रचलित कानुनको परिधिभित्र रहेर निर्वाचन प्रचारप्रसारका लागि सहयोग संकलन गर्न कुनै बाधा नपर्ने बताउनुभएको हो ।
तर, उम्मेदवार वा राजनीतिक दलले कसैलाई पनि निश्चित रकम तोकेर चन्दा माग्न नपाउने उहाँले प्रस्ट पार्नुभयो । प्रवक्ता भट्टराईका अनुसार उम्मेदवारले निर्वाचन प्रयोजनका लागि छुट्टै बैंक खाता खोल्नुपर्ने व्यवस्था छ र सो खातामा संकलित रकम व्यक्तिगत प्रयोजनमा खर्च गर्न पाइँदैन ।
“हामीसँग चन्दा ऐन छ । निर्वाचन र प्रचारप्रसारका लागि शुभेच्छुक तथा समर्थकबाट सहयोग लिन पाइन्छ । तर कसैलाई ‘यति दिनुपर्छ’ भनेर तोकेर माग्न पाइँदैन । स्वेच्छाले दिन चाहेमा निर्वाचन प्रयोजनका लागि खोलिएको खातामा लिन सकिन्छ,” प्रवक्ता भट्टराईले भन्नुभयो ।
यसैबीच, निर्वाचन आयोगले आगामी निर्वाचनका लागि आवश्यक मतपत्र छपाइ कार्यलाई तीव्रता दिएको जनाएको छ । हालसम्म ८४ लाख ४० हजार थान मतपत्र छपाइ भइसकेको आयोगले जानकारी दिएको छ ।
छपाइ भएका मतपत्रमध्ये ७ हजार १३७ वटा बाकसहरू प्याकिङ भइसकेका छन् । प्रवक्ता भट्टराईका अनुसार हालसम्म ३२ जिल्लाका लागि आवश्यक मतपत्रको छपाइ र प्याकिङ कार्य पूर्ण रूपमा सम्पन्न भइसकेको छ ।
आयोगले बाँकी जिल्लाहरूका लागि आवश्यक मतपत्र छपाइ र व्यवस्थापनको काम पनि युद्धस्तरमा भइरहेको जनाएको छ ।