विशेष महाधिवेशन अनिवार्य : कांग्रेस महामन्त्री विश्वप्रकाश शर्माको स्पष्ट भनाइ

नेपाली कांग्रेसका महामन्त्री विश्वप्रकाश शर्माले पार्टीको विधानअनुसार अब विशेष महाधिवेशन अनिवार्य हुने बताएका छन्।

आज पार्टी केन्द्रीय कार्यसमितिको बैठकमा धारणा राख्दै उनले भने, “विधानको धारा १७ को उपधारा २ अनुसार, ५४ प्रतिशत महाधिवेशन प्रतिनिधिले विशेष महाधिवेशन माग गरेको मितिले ९० दिनभित्र त्यो सम्पन्न गर्नैपर्ने बाध्यकारी व्यवस्था छ।”

उनका अनुसार, अहिलेको मूल प्रश्न नियमित महाधिवेशन कहिले गर्ने भन्ने होइन, विशेष महाधिवेशन माग भइसकेपछि त्यसको संवैधानिक प्रक्रियालाई पालना गर्नु मुख्य विषय हो।

शर्माले स्पष्ट पारे, “नियमित महाधिवेशन पुस, माघ वा वैशाखमा गर्न विधानले रोकेको छैन। तर विशेष महाधिवेशनको माग दर्ता भइसकेपछि त्यसलाई ९० दिनभित्र सम्बोधन गर्नु हाम्रो कानुनी र राजनीतिक दायित्व हो।”

५४ प्रतिशत महाधिवेशन प्रतिनिधिहरूले असोज २९ गते कार्यवाहक सभापति पूर्णबहादुर खड्कालाई हस्ताक्षर बुझाउँदै विशेष महाधिवेशनको माग गरेका थिए। त्यसैले, शर्माको भनाइअनुसार अब कांग्रेसले वा त विशेष महाधिवेशन वा सोही अवधिभित्र नियमित महाधिवेशन गरेर मात्र उक्त माग सम्बोधन गर्न सक्नेछ।

महामन्त्री शर्माले बैठकमा जोड दिँदै भने, “यो कुनै वैकल्पिक कुरा होइन, विधानले दिएको बाध्यात्मक निर्देश हो। त्यसैले द्विविधा हटाएर स्पष्ट निर्णयमा पुग्नुपर्छ।”

यससँगै कांग्रेसभित्र महाधिवेशनको समय र स्वरूपबारे जारी विवाद अझै तातिएको छ। पार्टीका नेताहरूबीच अब आगामी ९० दिनभित्र विशेष वा नियमित महाधिवेशन सम्पन्न गर्ने दिशामा अन्तिम सहमति खोज्ने तयारी देखिएको छ।