कुसे गाउँपालिका अध्यक्षमाथि आक्रमण, बचाउन जाने दुई युवा घाइते

सुर्खेततर्फ जाँदै गरेका कुशे गाउँपालिकाका अध्यक्ष हरिचन्द्र बस्नेतमाथि आइतबार बेलुका छेडागाड नगरपालिका–५, चखेलीमा साङ्घातिक आक्रमण भएको छ।

अध्यक्ष बस्नेतमाथि आक्रमण हुँदा उनलाई जोगाउन पुगेका नवराज शाही र दिपेन्द्र सिंह गम्भीर घाइते भएका छन्। घाइते दुबैजनालाई तत्काल उपचारका लागि नेपालगञ्ज पठाइएको प्रहरीले जनाएको छ।

अध्यक्ष बस्नेत भने सामान्य अवस्थामा छन् र उनलाई गम्भीर चोटपटक लागेको छैन। आक्रमणमा संलग्नको पहिचान भइसकेको भए पनि अनुसन्धान प्रभावित नहोस् भन्ने कारण देखाउँदै प्रहरीले नाम सार्वजनिक गर्न चाहेको छैन।