कुसे गाउँपालिकामा नेपाल तरुण दलको अध्यक्षद्वारा विपन्न परिवारलाई राहत वितरण

 गाउँपालिकाका  नेपाल तरुण दलका अध्यक्ष अर्जुन रोकायाले आफ्नो व्यक्तिगत खर्चमा विपन्न परिवारलाई राहत वितरण गरेर उदाहरणीय काम गरेका छन्।

अध्यक्षमा निर्वाचित भएको पहिलो कार्यको रूपमा उनले वडा नं. ३ स्थित दतिवरको हिलाखानी बस्तीमा राहत बोकेर नै विपन्न परिवारको घरदैलो पुगे। उनले २ बोरी चामल, १ दर्जन कापी र कलम हस्तान्तरण गरेका थिए।

यो राहत विशेष गरी एक वर्षदेखि भारतमा आश्रित रहँदै आएका कालि बहादुर रोका मगरको परिवारलाई लक्षित गरिएको हो। रोजगारीका लागि बाहिरिएका कालि बहादुरले परिवारमा खर्च पठाउन नसक्दा उनका बालबालिकाले शिक्षा र खानामा ठुलो समस्या व्यहोर्दै आएका थिए।

अध्यक्ष रोकायाले युवाहरु केशव बस्नेतसहितको टोली लिएर घरमै पुगेर राहत हस्तान्तरण गर्दा बस्तीभर आशा र खुसीको माहोल छायो। उनका अनुसार, "सामाजिक जीवनमा पहिलो काम विपन्न परिवारको पीडामा साथ दिनु हो भन्ने विश्वासका साथ मैले यो कदम चालेको हुँ।"

यस कार्यलाई स्थानीयले मानवता र नेतृत्वको उत्कृष्ट उदाहरणका रूपमा लिएका छन्। विपन्न परिवारका बालबालिकाले विद्यालय जानका लागि आवश्यक कापी–कलम पाउँदा उज्यालो भविष्यको आशा जागेको छ भने राहत पाउँदा परिवारले केही दिनका लागि भए पनि राहतको सास फेर्ने अवसर पाएका छन्।

कुसे गाउँपालिकामा यो कदमले युवापुस्तामा सामाजिक सेवामा सक्रिय हुने प्रेरणा जगाएको छ। अध्यक्ष रोकायाले आगामी दिनमा पनि यस्ता अभियान निरन्तर चलाउने प्रतिबद्धता व्यक्त गरेका छन्।