रास्वपाका नेता अरनिको पाँडे चार दिनका लागि हिरासतमा

राष्ट्रिय स्वतन्त्र पार्टी (रास्वपा)का नेता तथा राष्ट्रिय योजना आयोगका पूर्वसदस्य अरनिको पाँडेलाई चार दिन हिरासतमा राख्न काठमाडौं जिल्ला अदालतले अनुमति दिएको छ।

सामाजिक सञ्जालमार्फत महिलामाथि गालीगलौज र चरित्रहत्या गरेको आरोपमा बुधबार पक्राउ परेका पाँडेलाई प्रहरीको साइबर ब्युरोले अनुसन्धानका लागि हिरासतमा राखेको हो।

एक महिलाले सामाजिक सञ्जालमार्फत आफूलाई अपमान र चरित्रहत्या प्रयास भएको दाबी गर्दै साइबर ब्युरोमा जाहेरी दिएपछि पाँडेविरुद्ध पक्राउ पुर्जी जारी गरिएको थियो। पक्राउ पुर्जी जारी भइसके पनि उनी आफैं बुधबार साइबर ब्युरोमा उपस्थित भएका थिए।