लेखा समितिको बैठक बस्दै, पोखरा अन्तर्राष्ट्रिय विमानस्थलको प्रतिवेदनमाथि आज छलफल हुने

संघीय संसदअन्तर्गत रहेका पाँचवटा संसदीय समितिका बैठकहरू आज बस्दैछन्। संघीय संसद सचिवालयका अनुसार सार्वजनिक लेखा समिति, अर्थ समिति, महिला तथा सामाजिक मामिला समिति, पूर्वाधार विकास समिति र शिक्षा, स्वास्थ्य तथा सूचना प्रविधि समितिका बैठकहरू आज तय गरिएको हो।

सबैभन्दा चासोको विषय बनेको सार्वजनिक लेखा समितिको ४१औं बैठक आज दिउँसो १ बजे सिंहदरबारस्थित अर्थ समिति कक्षमा बस्दैछ। बैठकमा पोखरा क्षेत्रीय अन्तर्राष्ट्रिय विमानस्थलसम्बन्धी स्थलगत अध्ययन उपसमितिको प्रतिवेदनमाथि छलफल हुने कार्यसूची रहेको छ।

उक्त उपसमिति सांसद राजेन्द्र लिङ्देनको नेतृत्वमा गठन गरिएको थियो। उपसमितिले विमानस्थल निर्माण प्रक्रियामा गम्भीर अनियमितता र भ्रष्टाचार भएको निष्कर्ष सहित प्रतिवेदन सार्वजनिक लेखा समितिमा बुझाएको छ।

तर, यस प्रतिवेदनप्रति चिनियाँ सरकारी निर्माण कम्पनी चाइना सीएएमसी इन्जिनियरिङ कम्पनी लिमिटेड (CAMCE) ले कडा असन्तुष्टि जनाएको छ। कम्पनीले प्रतिवेदनलाई “गलत” भन्दै, त्यसमा “थुप्रै तथ्यगत त्रुटिहरू” रहेको दाबी गरेको छ।

कम्पनीको विज्ञप्तिमा भनिएको छ, “प्रतिवेदनमा हाम्रो कम्पनीसम्बन्धी उल्लेख गरिएका विषयवस्तुहरू पूर्ण रूपमा तथ्यसँग मेल खाँदैनन्। यसले परियोजनाको सम्पूर्ण कार्यान्वयन प्रक्रियाको वस्तुगत विश्लेषणको अभाव देखाउँछ, जुन हामीलाई अत्यन्तै आश्चर्यजनक र चिन्ताजनक लागेको छ।” कम्पनीले थप दाबी गरेको छ, “हामीले सबै दायित्वहरू ठेक्का दस्ताबेज र कार्यान्वयन सम्झौता अनुसार पूरा गरेका छौं, र यी सबै प्रक्रियाका प्रमाणहरू सुरक्षित रूपमा राखिएको छ।”

पोखरा क्षेत्रीय अन्तर्राष्ट्रिय विमानस्थल सन् २०२३ को जनवरी १ देखि औपचारिक रूपमा सञ्चालनमा आएको हो। उक्त विमानस्थलको निर्माणमा ठूलो विदेशी लगानी र चासो रहेकोले आजको समितिको छलफल विशेष रूपमा महत्त्वपूर्ण मानिएको छ।