बर्दियामा करेन्ट लागेर दुई जनाको मृत्यु, दु:खद् घटनाप्रति श्रद्धाञ्जली

बर्दियामा अलग–अलग स्थानमा करेन्ट लागेर दुई जनाको दु:खद् मृत्यु भएको छ। बाँसगढी नगरपालिका–९ माछागढ निवासी ५७ वर्षीय राजेन्द्रजंग शाह र गुलरिया नगरपालिका–१२ भैसाहीका २१ वर्षीय वीरेन्द्र थारुको शनिबार र आइतबार गरी करेन्ट लागेर निधन भएको जिल्ला प्रहरी कार्यालय बर्दियाले जनाएको छ।

राजेन्द्रजंग शाहलाई आइतबार बिहान ७ बजेतिर घरनजिकैको धान खेतमा बीउमा सिँचाइ गर्ने क्रममा करेन्ट लागेको थियो। गम्भीर घाइते भएका उनलाई तत्काल उपचारका लागि कोहलपुरस्थित मेडिकल कलेज लगिएको थियो। तर, बिहान ८ बजे चिकित्सकले उनलाई मृत घोषणा गरे।

त्यस्तै, शनिबार दिउँसो करिब पौने ४ बजे बढैयाताल गाउँपालिका–९ कान्तिपुरमा घर निर्माणको क्रममा २१ वर्षीय वीरेन्द्र थारुलाई करेन्ट लागेको थियो। भीमबहादुर दर्जीको घरमा रड सिधा गर्ने क्रममा नजिकैको विद्युत् लाइनमा छोइएर करेन्ट लाग्दा उनी गम्भीर घाइते भएका थिए। उनलाई उपचारका लागि बर्दिया अस्पताल पुर्‍याइए पनि चिकित्सकले मृत घोषणा गरेका थिए।

दुबै घटनाबारे प्रहरीले आवश्यक अनुसन्धान गरिरहेको जिल्ला प्रहरी कार्यालय बर्दियाका प्रहरी नायब उपरीक्षकले जानकारी दिए।

दु:खद् घटनामा ज्यान गुमाउनुभएका राजेन्द्रजंग शाह र वीरेन्द्र थारुप्रति हार्दिक श्रद्धाञ्जली अर्पण गर्दछौं। शोकसन्तप्त परिवारप्रति गहिरो समवेदना प्रकट गर्दै दिवंगत आत्माको चिर शान्तिको कामना गर्दछौं।